Allt er gott sem endar vel

Ég fékk herbergið sem ég vildi. Vei! Frábær staður, frábært fólk sem ég mun búa með og frábært verð. Hin heilaga þrenning þegar kemur að bofælleskab! Þannig að nú kveð ég Vestergade 6a og býð velkomin Østbanetorvet 5.

Myndir frá Vestergade:

Óskir um teppalagt gólf og húsnæði

Í gærkvöldi óskaði ég þess í fyrsta skiptið að gólfið í herberginu mínu væri teppalagt. Ástæðan er einfaldlega sú að ég missti dýrmæta Kanebo púðrið mitt í gólfið og það brotnaði. Þetta er ekki eina snyrtivaran sem hefur "misst lífið" af völdum trégólfs. Uppáhalds augnskugginn og MAC kinnalitur eru líka fallin í valinn. Væl.

Húsnæðisörðugleikar mínir virðast engan enda ætla að taka. Á mánudaginn fékk ég símtal frá gaurnum sem ætlaði að leigja mér herbergi. Hann tilkynnti mér það að ég gæti bara fengið herbergið til 1. ágúst sem passar mér alls ekki. Vikan hefur þess vegna farið í örvæntingarfulla leit að nýju herbergi. Leitin hefur ekki gengið nógu vel. Flest herbergin eru rottuholur með allt of háa leigu. Reyndar er eitt herbergi sem ég vildi gefa allt fyrir að fá þannig að krossið fingur fyrir mína hönd. Ég er síðan að fara að skoða herbergi á morgun og íbúð á mánudag en við Ellen, bekkjarsystir mín, erum jafnvel að spá í að leigja saman.

Hef ekki mikið til að blibba um. Það eina sem ég virðist geta hugsað um er að finna húsnæði.

Bless.

Ég kem heim!

Já, ég, ásamt tveimur eða þremur bekkjarfélögum, mun gera fyrsta árs lokaverkefni mitt á Íslandi. Vei. Við erum í viðræðum við nokkra aðila og það kemur í ljós í næstu viku hvern við munum vinna fyrir. Þannig að ég verð á landinu í þrjár vikur í maí. Ég er voða glöð vegna þess að ég hef hugsað mér að eyða sumrinu í Kaupmannahöfn og núna fæ ég samt smá bút af ykkur og landinu mínu.

Ég er búin að jafna mig á flensunni frá helvíti. Ég hélt ég myndi hoppa út um gluggann á tímabili og var farin að halda að ég myndi aldrei jafna mig. Fyrir vikið óverdósaði ég á South Park og nú virðist allt minna mig á atriði í þáttunum sem segi oft og iðulega þeim sem eru í kringum mig frá.

Annars er ég að fara að flytja 1. apríl. Ekki nenni ég því og ég ætla að bara að fá sterku strákana úr bekknum til að gera allt það erfiða. Svo get ég bara dundað mér við að raða og svoleiðis. Nú í stað tveggja stúlkna mun ég búa með fjórum öðrum og með eitt baðherbergi! Yikes.

Ég keypti minn fyrsta rauða varalit í gær. Mér hefur alltaf fundist ég asnaleg með varalit en þessi er bara alveg gorgeous. Já, ansi margt í fréttum...

Slúðrið beint í æð

Ég uppgötvaði gullnámu í morgun. Það er hægt að lesa Hér og Nú, Birtu og DV á visir.is! Ég er núna hreinlega búin að liggja yfir íslenska slúðrinu enda Íslendingur búsettur á erlendri grundu (já, einstaklega fínt eitthvað) þannig að mig þyrsti í hneyksli af litlu eyjunni minni. En þetta er nú alltaf sama bölvaða tóbakið. Já, þessi sæta stelpa er byrjuð með öðrum fótboltakappa. Þessi er ennþá á nærbuxunum í slúðrinu. Þessi er s.s. ennþá mini-celeb á Íslandi og þessi var að kaupa sér nýjan bíl. Nú man ég af hverju ég las bara slúðrið þegar ég fór í klippingu á ca. sex vikna fresti. En nú er ég klár í slaginn. Myndi standa mig vel í saumaklúbbi í Reykjavík í kvöld... svona fyrir utan nefrennslið og kramda flensuhárið.

Ég er að deyja...

Úr ást? Nei, úr pest. Skólinn minn er nefnilega stundum eins og leikskóli, þ.e.a.s. börnin smitast af öllum hugsanlegum flensum. Núna er ég s.s. búin að liggja í bælinu í nokkra daga og mér líður eins og Michelin manninum innan í mér, öll einhvern veginn bólgin. Gómurinn er líka bólginn. Gat varla sofið í nótt vegna þess að ég er með svo bólgin góm. Hvað er nú það?! Ég þakka þó guði og englunum fyrir youtube.com en ég hef skemmt mér við að horfa á South Park á milli þess sem ég snýti mér og sef.

Jæja, þetta tók á. Finn að hausinn er að bólgna enn meira við þessa áreynslu sem fylgir pikkinu. Sendið mér nú strauma eða jafnvel e-mail eða jafnvel heillaóskaskeyti.