Ég var rænd um helgina:-( Töskunni minni var stolið af Ellefunni á laugardagsnótt. Þetta var forláta leðurtaska sem ég keypti í Amsterdam. Í henni voru seðlaveski, gsm sími, lyklar, jakki, loðkragi, leðurhanskar, húfa og smádót. Allt horfið! Hvernig getur fólk verið svona ómerkilegt?! Hafið augun opin, kæru vinir.

P.s. Mig vantar símanúmerin hjá nánast öllum. Eruð þið til í að senda mér sms þannig að ég geti sett þau inn.

Með kassalaga augu

Það er nú meira en að segja það að flytja tónlist inn á iTunes. Gvöð menn góður! Ég held ég hafi bara eytt öllum mínum frítíma í það síðustu daga enda komin með rúmlega 2000 lög inn. En samt er svo mikið eftir:-/ Það er ekki lengur fuglasöngur sem vekur gleði mína heldur lítið ding hljóð þegar iTunes er búið að hlaða inn disknum. Ding ding ding!

Þórir flaug til Danmerkur í morgun. Hann kom og kvaddi okkur Þórhildi í gærkvöldi. Mín lokaorð til hans voru: Vonandi finnurðu húsnæði og vinnu sem fyrst. Þórhildar voru: Iss, þú þarft bara smokka og nærföt til skiptana. Útskýrir forgangsröðun okkar Þórhildar í fáum orðum. Ég segi þak yfir höfuðið, atvinna til að hafa í sig og á og svo getur maður einbeitt sér að því að fara í sleik og sofa hjá. Hún segir samfarir og allt hitt er seinni tíma hausverkur. Hér er kannski komin ástæðan fyrir því að ég hef ekki verið við karlmann kennd í háa herrans tíð (og samt á ég íbúð og er í fínni vinnu). You can't have it all. Eða hvað?

Á morgun förum við Hilma í dekur á Nordica Spa. Ég held það verði ekkert annað en stórkostlegt!

Þar sem enginn gat síðustu getraun birtist hér svarið: Lagið Flood með sveitinni Jars of Clay.

Og hér kemur ný. Hvaða lag? Hvaða flytjandi?
Newlywed a year ago
But you're still checking each other out

Ég undirbý komu frelsarans

Ég hef séð ljósið. Í byrjun mars mun frelsarinn sjálfur koma til mín. Hann mun birtast mér í formi ipod 20Gb. Yee haa! Ég hef þess vegna hafið söfnun honum til heiðurs. Söfnun þessi felur í sér flutning á allri minni tónlist inn á itunes sem frelsarinn mun síðan innbyrða þegar við hittumst loks. Ef fólk vill leggja söfnuninni lið er því bent á að koma heim til mín með eðalmúsík og færa fórnir á altari tónlistarinnar, nemlig itunes.

Og svona eitt stykki getraun í tilefni komu hins eina sanna:

Hvaða lag? Hver flytur?

Downpour on my soul
Splashing in the ocean, I'm losing control

America's Next Top Model

Þið sem þekkið mig vel vitið að besti vinur minn heitir Sæmundur sjónvarpstæki... sumir kalla hann imbakassann en mér finnst það hafa neikvæða merkingu bæði fyrir mig og hann. Sæmundur færir mér mikla gleði. Við hlæjum saman og grátum líka saman. Ég grét til dæmis mjög mikið þegar Sæmundur sýndi mér og sagði frá sambandi Meredith og Ian sem endaði með trúlofun og hamingjutárum. Ég fékk reyndar sms frá Þórhildi um daginn sem í stóð: Meredith og Ian eru hætt saman. Þú hefðir átt að grenja aðeins meira! En það er önnur saga. Við Sæmundur áttum góða stund saman nú í kvöld og hann kynnti mig fyrir ungum stúlkum sem ólmar vilja verða næsta toppfyrirsæta Bandaríkjanna. Þessi hópur lofar góðu, meira að segja er ein stelpan að verða blind (sorglegt samt) þannig að það verður over dose af drama hjá Kamillu og Sæmundi næstu vikurnar. Jæja, Sæmi kallar. Sjáumst!

Nei, komiði margblessuð og sæl! Langt síðan leiðir okkar hafa legið saman. Nú gætuð þið hafa verið að hugsa: Æ, æ, æ, er hún Kamilla skemmtilega og frábæra alveg hætt að nenna að blibba? Svarið er einfaldlega: Já, eiginlega en nú skal ráðin bót í því!

Skírlífi var fagnað á sjálfum degi elskenda hjá Þóri í gær. Nokkrir vel valdir einhleypingar komu saman, borðuðu kökur (Þórir er svakalegur bakari!) og lögðu á ráðin um heimsyfirráð eða var það kannski bara um hvernig maður eigi að fá aðila af gagnstæðu kyni (jú, eða sama kyni) til við sig. Ýmsar aðferðir voru ræddar en ég er enn sem áður á því að engir álitlegir karlar séu þarna úti fyrir kröfuhörðu Kamillu (sem er reyndar ekkert fullkomin sjálf... en óskaplega nálægt því. Haha!)

Af mér er annars allt gott að frétta:
Það eru tæpir tveir mánuðir þangað til ég flyt til DK og er að öllum líkindum búin að leigja út íbúðina mína.
Ég er orðin hooked á Idol keppninni og held með Hildi Völu.
Ég er með rosalegt kvef. Hausinn stútfullur af grænu hori. Yummy!
Fór á djammið á föstudaginn. Það var ágætt þrátt fyrir háværar yfirlýsingar mínar um drepleiðinlegt næturlíf í Reykjavík. Reyndar var skemmtilegast heima hjá mér þar sem við Kata dönsuðum við Piano Man og fleiri slagara og sömdum free-style dansa.
Ég hef óseðjandi löngun til að versla föt. Arg! (Þetta er reyndar ekki gott...)
Ég horfði á Angels in America um helgina og vá vá vá!!!
Ég fór á Mýrarljós með Þórhildi. Mjög gott leikrit.

Jæja, pís át dúds!

Hvaða lag? Hvaða flytjandi?
Show me how to read
Show me how to write
These are the things you can do for me

Ég veit...

að ég er búin að vera hryllilega löt við að blibba enda ekki margt að gerast í mínu annars frábæra lífi. Sem betur fer er þó leiðinlegasti mánuður ársins búinn. Bless bless! Næturlífið heldur áfram að drepa mig úr leiðindum og til að breyta til fór ég í keilu síðustu helgi. Ég var einstaklega illa upplögð en komst fljótt í gírinn eftir að hafa flogið á hausinn á brautinni. Svo braut ég nögl vegna þess að ég tók allt of þunga kúlu og fór næstum með henni í átt að keilunum. En hæfileikar mínir í keilu eru svipaðir og hæfileikar mínir í pool, þ.e. frábærlega miklir! Ég endaði í 2. sæti. Ingveldur vann en hún er líka atvinnumaður í keilu... Melkorka vermdi síðan þriðja sætið, Þórhildur það fjórða og Kata fimmta og síðasta sætið. Það sem var fáránlegast við þetta allt saman var að ég hringdi í Þóri og sagði honum hvað ég var að gera (sem mér fannst ótrúlega sniðugt). Þá sagði hann mér hlæjandi að hann væri líka á leiðinni í keilu. Þvílík tilviljun! Reyndar er hann svo tapsár að hann kýs að gleyma því að hann hafi alfarið farið í keilu um helgina vegna þess að Gulli vann hann. Híhí. Ég er meira að segja til í að fara aftur næstu helgi. Vill einhver memm?

Á föstudaginn fór ég reyndar niður í bæ. Fór á tónleika á Grandrokk og sá Jan Mayen og eitt lag með Ceres 4, leiddist síðan á Ölstofunni, myglaði á Kaffibarnum, og dó loks úr leiða á 11-unni. Fór snemma heim vegna þess að þegar ég ákveð að mér leiðist að þá er ekki aftur snúið...

Getraunin er orðin ómissandi liður í þessu blibbi... eða hvað finnst ykkur. Finnst kannski bara Hannesi þetta skemmtilegt vegna þess að hann er svo klár?;-)

Hér kemur hún samt:
Hvaða lag? Hvaða flytjandi?

Touch if u will my stomach
Feel how it trembles inside